Dudu: "Povu Ermera Apoio Governu Xanana"

GLENO-Maioria komunidade Distritu Ermera inklui mos juventude, fo apoio ba governu Xanana Gusmao. Sira espera governu Xanana bele hametin unidade nasional no kria paz ba komunidade Timor Leste nebee konsege nakfera tiha iha tinan 2006. Sira iha esperasaun nee tanba hare membru kabineti PM Xanana Gusmao, nebee ema mesak matenek no iha esperiensia barak. Tanba nee sira kaibineti governu Xanana nee bele dezenvolve nasaun nee ba oin ho diak. “Maske ema balun dehan ‘sarjana supermie’, maibe komunidade Distritu Ermera fiar katak, sira sei halao servisu ho diak. I hau rasik fiar katak, tinan 5 ba oin, futuru programa governu AMP sei lao ho suksesu. Neduni komunidade Distritu Ermera fo apoio maka’as ba governu ida nee,” hateten Ernesto Fernandes alias Dudu wainhira husu ninia oponiaun konaba governu AMP, foin lalais nee iha Gleno. Dudu mos fo kritika makaas konaba dezisaun governu Xanana foti konaba Administrador Distritu Ermera. Nia hare katak dezisaun nebee governu foti la bazea ba aspirasaun povu. Tuir lolos, katak Dudu, wainhira foti dezisaun ruma ba komunidade sira iha baze, labele desidi deit husi leten. Antes atu desidi tenki konsulta uluk ba baze. “Hanesan administrador Distritu Ermera, derpente iha ona administrador foun. Nee hau la simu tanba la turi dutrina demokrasia. Tuir lolos, governu konsulta uluk lai ho povu, rona povu nia hanoin. Labele hare deit husi leten,” hateten Dudu. Tuir nia hanoin, atu forma governu distrital hanesan Ermera, partidu nebee manan eleisaun maka iha direitu forma governo distrital lokal no hatudu administrador. Entaun direitamente PD maka iha direitu hatudu administrador tanba PD mak manan maioria iha eleisaun legislativa foin lalais nee. “Ida nee hanesan kritika ida ba governu. Maibe hau apoio makaas governo Xanana. Mas, hau mos sei la apoio, se kuandu foti desizaun ida la respeita komunidade sira iha kraik. Tenki konsulta uluk ho liders komunidades lokal hanesan igreja, povu, juventude no ema hotu. Laos hatun deit husi leten”. “Nee importante,” katak Dudu. “Atu sai nai ulun iha fatin ida, povu tenki hatene, laos povu hakpodak mai iha tiha ona. Se hanesan nee, entaun laiha mudansa,” hateten Dudu. dlo Fonte: STL, Edition: 17 October 2007