Xanana Husu Fretilin Lalika ‘Egois’

DILI – Primeiru Ministru, Kay Rala Xanana Gusmão husu ba partidu Fretilin atu lalika ‘egois’ liu, hodi hatete dehan governu Aliansa Maioria Parlamentar (AMP) mesak ema otonomista.

Tuir Xanana, durante Fretilin ukun, ema nunka tau problema hatete katak sira nia ema balu uluk Jacky Anwar (eis Pangdam IX Udayana) nia anak emas.

PM Xanana kasu lia hirak nee relasiona ho deklarasaun husi lider politiku partidu Fretilin balun nebeee duun katak kompostu Governu AMP mesak ema otonomista.

“Uluk ukun karik ema ida la tau problema dehan Jacky Anwar nia anak emas no balu nia laen (TNI) hela iha sorin,” dehan PM Gusmão ba jornalista sira hafoin inkontru ho Prezidenti Republika iha Palacio da Cinzas, Kaikoli, Dili, Kinta (23/8).

Xanana husu atu iha Timor lalika kontinua ho tradisaun aat nebee haree mos ba ema nia latar belakang. Tanba, uluk halao rekonsiliasaun atu hadomi malu no simu malu. Ikus mai haree fila fali ba latar belakang, entaun diak liu hasai tiha lei ida atu nasionalista 100 % hela iha Timor no sira nebee la nasionalista 100 soe tiha ba liur.

“Hau sei husu ba PN atu halo lei ida nebee kria orgaun ida para investiga ita hotu nia latar belakang hodi haree dehan se mak asuwain tebes no se mak lae” Xanana hateten.

Nia hatutan, Se hotu-hotu konkorda iha Parlamentu, entaun nasionalista 100 % hela iha Timor no sira nebee la nasionalista 100 % ba hotu soe tiha iha tasi, Indonesia, Australia ka iha nebee para Timor nee bele moris diak.

Xanana dehan, nia lakohi ona halo apelu bebeik, tanba sosiedade iha nasaun nee lakon ona kultura rona malu. Neduni, husu deit ba joven no militante partidu politiku sira atu tuur hamutuk hodi haree probelma nee, tanba nee problema kultura politika.

Tuir Xanana, iha demokrasia, fatin hotu-hotu hanesan. Ida tuun, ida sae fali, se lae la lika iha multipartidariu, maibe husik partidu ida deit mak moris, atu nunee sira mesak mak ukun nasaun ida.

Xanana fiar katak agora dadaun administrador distritu sira servisu hamutuk hela ho komandate polisia distritu sira nomos koalia ho administrador sub distritu no koamdante sub distritu sira hodi hakalma situasaun nee. Maibe, tuir nia, tenki iha mos partisipasaun husi sosiedade li-liu ba joven no elementu partidu.

Fretilin Nia Aspirasaun Sei La Monu ba Rai

Eis Prezidenti Republika senti katak nia apela mos ema la rona ona, maibe nia koko nafatin hodi halo apelu ba iha distritu tolu iha parte leste (Baucau, Viqueque, ho Lautem), ba partidu hotu-hotu atu hamutuk ho adiministrador no polisia koalia ho Igreja katak nasaun nee la bele nunee nafatin.

Asaun konkertu husi governu atu rezolve problema nebee akontese iha parte leste, Xanana esplika, sei impoen nafatin lei no orden, liu husi dalan dialogu ba malu. Iha loron (20-21/8) liu ba, ema 2.000 atu mai halo manifestasaun, maibe tanba ema komesa sadar ona katak buat nee laos nunee. Inkonstitusional nee ema balu deit mak hanoin no apreszenta iha Parlementu nia laran karik, neduni ema lakohi ona atu halo manifestasaun.

Nia dehan, agora dadaun seidauk bele ba vizita iha distritu-distritu inklui mos distritu tolu iha parte leste tanba sei prepara programa orsamentu iha konselhu ministru nebee sei lori ba Parlamentu Nasional. Maibe, Xanana garante katak liu tiha ida nee nia sei ba. Tanba, iha tomada de posse eis komandante Falintil nee promete atu ba distritu hotu-hotu maibe, laos deit ba distritu nee fo apoiu barak ba AMP, tanba governu nee ba povu Timor tomak.

Xanana hatete, militante Fretilin nia aspirasaun no hanoin sei la monu iha rai. Programa nebee Fretilin hatoo hodi hili Fretilin, AMP sei konsidera. Tanba povu nee ida deit, governu nee hamrik atu haree ba povu nia susar no terus.

Kazu Governu Fretilin

Xefi governu hatete katak iha semana oin mai governu liu husi konselhu ministru sei debate nia programa hodi bele aprezenta ba Parlamentu Nasional. Nunee, sei haree mos ba kazu seluk nebee mosu iha tempu governasaun partidu Fretilin nian. Maibe, PM Xanana la esplika klaru kazu nebee refere konaba saida. dd