DILI-Prezidenti Partidu Frente Revlusionariu Timor Leste Independenti (Fretilin), Francisco Guterres alias Lu Olo hateten, Fretilin la mehi atu tama ou fila fali ba partidu ASDT, nebee lidera husi Proklamador Independnesia Unilateral Timor Leste, Francisco Xavier do Amaral.
"Hau hanoin komentariu nee la iha fatin, tanba Fretilin moris laos atu tama fali ba partidu seluk (partidu ASDT) no partidu ASDT agora iha laran nee dodok dadauk ona, ami la iha intensaun, nein mehi tan para dehan katak atu ba hamutuk fali ho ASDT," haktuir Lu Olo ba STL iha Hotel Timor, Dili, Tersa (22/4).
Lu Olo hasai reasaun nee hodi kontra deklarasaun Prezidenti ASDT nebee husu Fretilin atu hasai tiha lia fuan Revolusionariu mak foin bele tama ba ASDT. Tanba tuir Xavier, lia revolusionariu nee, uniku komunista sira mak uza.
Lu Olo afirma, organizasaun politika Fretilin iha istoria ketak, nebee la iha relasaun absulutamente ho partidu seluk hanesan ASDT. ASDT nee moris foin dadauk funu hotu, ASDT ida uluk nee baze Fretilin nian, nunee Lu Olo haktuir, Fretilin kontinua nafatin kaer ninia luta, konviksaun politika, nebe hakarak independensia ba rai ida nee.
"Ami luta durante tinan 24 ho ami nia estrutura rasik iha resistensia armadas, iha frente klandestina, diplomatika, nebee ami la iha relasaun ho ASDT lideransa Francisco Xavier Amaral," Lu Olo hatete.
Nia esplika, Fretilin sei kontinua nafatin revulosionariu, tanba nee hola parte husi Fretilin nia propiu patrimoniu. "Ami lori ida nee duni mak hetan independensia ba rai Timor leste. Ami la hasai ida. Xavier do Amaral kala iha problemas barak, dala ruma nia katuas ona bele koalia buat balun nebee la iha fatin atu koalia," Lu Olo hatutan.
Nia mos hateten, Fretilin laos partidu komunista nebee hanesan Xavier do Amaral koalia sai ba publiku foin dadauk nee, tanba deit iha naran Revolusionariu.
"Statementu sira nee hotu baku ba iha mamuk, hau konseila senor sira seluk, senor Xavier do Amaral para atu preokupa liu ho sira nia propiu partidu nee, duke ho fali Fretilin atu muda ida nee, muda ida neeba. Diak liu hare ba sira nia uma laran rasik nebee oras nee dadauk buat hot-hotu lao la los," nia hateten.
Normalmente, isplika Lu Olo, kuandu ema nebee dehan revulosionariu nee so komunista deit atu uza ida nee, nia hanoin tenki tau iha hanoin nee tuir nia dalan para bele too iha konkluzaun ida deit.
"Permeiru porke buat ida kuandu atu halo revolusionariu nee, nee revolusi ona ema nia kompartamentu, ema nia hahalok, ema nia mentalidade, i hakarak atu muda husi sistema nebee Indonesia implanta husik hela ita nia rai nee para atu bele hadia fali."
Nia hatutan tan, revolusionariu ida signifika mos para atu bele muda ema nebee hanesan ho hanoin nee redrogadu liu, nee katak la hanoin ba kotuk liu, hanoin nebee hanesan mate, para atu muda ida nee para hodi bele nia hanoin nee moris hodi lao ba oin.
Kaer Metin Elisaun Antisipada
Komentariu kona ba deklarsaun Prezidenti Partidu PSD, Mario Carrascalao kona ba eleisaun antisipada ho kondisaun tenki hamos kilat nebee vice Prezidenti Fretilin Rogerio Tiago Lobato uluk fahe ba grupu sekretu Fretilin nian.
Lu Olo hatete, elisaun antisipada nee Fretilin nia hanoin no Fretilin sei kaer metin nafatin. Maibe, lia fuan Mario Carascalao nian nee lagu lama ona.
"Fretilin hasai kilat, kilat nebee, kilat Alfredo nian, kilat Salsinha nian, kilat sira seluk nebee fahe, kilat nebee dehan katak Rogerio Lobato fo. Nee maka Rogerio entrega ona no hetan kastigu, kilat nebee tan. Keta Mario Carascalao maka fahe kilat nia hatene entaun nia hateten," dehan Lu Olo.
Kilat nebe uluk fahe, tuir Lu Olo, laos partidu Fretilin maka fahe, maibe governu maka fahe. Iha neba Rogerio iha intensaun dehan katak ba oho ema ou atu defende estadu.
"Hau lakohi fila fali dezisaun tribunal nian, tribunal nia dezisaun hola ona, mas kilat nebee uluk iha nee governu nian, laos Fretilin nian," Lu Olo tenik. agi
Fonte: STL (edisaun- 23 Abril 2008 )Fonte seluk:
Sem comentários:
Enviar um comentário