Governo reforma F-FDTL ho bolsa estudo

DILI - Sekretario do Estadu asuntu Defeza, Julio Thomas Pinto hatete, programa treinamentu hasae kapasidade no professional membru F-FDTL, governu AMP prepara orsamentu eskolarship atu estuda iha universidade UNTL, UNPAZ no fatin seluk.

Tuir Julio, agora dadaun komando F-FDTL halao nafatin kordenasaun ho Australia, Amerika no nasaun sira seluk atu haruka membru F-FDTL iha fatin neba hodi halo estudu komparativu, tanba nasaun hirak neba sai modernu ona. Rekrutamentu nee planu ida, nee sei hahu 2007 ba oin. Maibe prosesu rekrutamentu nee sei liu husi prosesu Sekretario Defeza halao kordenasaun ho Komando F-FDTL.

“Ita fiar katak aban rua iha tinan 2020 mai, ita nia militar sei sai militar nebee professional,” dehan Julio Pinto ba jornalista sira iha Dili, Kuarta (22/8).

Konaba problema petisonario nian, tuir Julio, nee sei prosesu negosiasaun. Agora dadaun sei hein hela estadu atu halo task force hodi organiza dialogu. Maibe tenki respeitu kuandu ba komando F-FDTL ho nia posisaun ruma koalia konaba kazu Major Alfredo nian no Petisonariu nian presiza mos tau atensaun ba komando F-FDTL nia ideias.

Sekretario Defeza nee fo klaru katak problema iha rai laran nee, responsabilidade PNTL nian, mas PNTL hare ba ladun fo maximu servisu tanba fasilidade limitadus, entaun foti politika F-FDTL fo ajuda.

Konaba situasaun seguransa iha Distritu Baucau no Viqueque, Sekretario Defeza nee esplika katak komesa diak uitoan. Maibe kordenasun lao nafatin hodi bele fo garantia. Kondisaun parte Leste agora dadaun sei iha akontesementu, maibe nee ladun boot hanesan semana kotuk liuba.

Tuir nia situasuan komesa normal fali no espera katak iha semana nee nia laran situasuan normal hodi dezenvolvimentu mos bele lao. Governu AMP loke-an nafatin ba see deit no partido nebee deit tanba governu nee iha komitmentu atu dezenvolve nasaun nee. Laos partisipasaun partido AMP deit maibe mos husu partisipasaun partido sira seluk ejisti iha nasaun. Partisipasaun nee loke dialogu hodi simu ideias konstrutivu ba povu ho nasaun nee.

“Hau hanoin komando F-FDTL halo hela evaluasaun, hodi hare situasuan aktual iha Baucau no Viqueque, see situasaun diak ona, membru sira iha neba komesa rekua dadu,” Julio hatete.

Prezensa F-FDTL iha Baucau, Bercoli Viqueque, Uato-Lari, laos battalion, maibe koloka ho tipu seksaun. Iha Uato-lari seksaun rua, no fatin seluk seksaun ida, tanba forsa limitadus. Membru F-FDTL too agora hela deit 717 soldadus. bre STL, 23,08.2007